रामको मूर्ति बनाउन काली गण्डकी नदीको देव शिला जनकपुरधाममा

0
35

भारतको उत्तर प्रदेशस्थित अयोध्यामा निर्माणाधीन मन्दिरमा भगवान् रामको मूर्ति बनाउन काली गण्डकी नदीको देव शिला जनकपुरधाममा आइपुगेको छ ।

हिन्दुहरूको पवित्र धार्मिक स्थल अयोध्यामा निर्माणाधीन उक्त मन्दिरमा भगवान् रामको मुख्य मूर्ति बनाउन शालिग्राम शिला पाइने विश्वकै एक मात्र नदी काली गण्डकीबाट निकालेर भारत लैजानको लागि जनकपुरधाम ल्याइएको हो ।

नेपाल सरकारको मन्त्रिपरिषद् बैठकको निर्णयअनुसार १८ र १६ मेट्रिक टन तौल भएका सात फिट लम्बाइ पाँच फिट चौडाइ र तीन दशमलव पाँच फिट मोटाइका दुई शिलाको पहिचान र क्षमा पूजाको काम सम्पन्न भएपछि शिला जनकपुरधाम हुँदै अयोध्या पठाउन लागिएको हो ।

उक्त शिलाबाट भगवान् रामको बालस्वरुप निर्माण गरिनेछ । शिलाबाट कुदिएर निर्माण गरिने भगवान् रामको बालस्वरुप राम मन्दिरको गर्भगृहमा रहने शिला सङ्कलन तथा पठाउने कार्यमा सक्रिय रहेका जानकी मन्दिरका महन्थ रामतपेश्वर दासले जनाएको छ ।

‘राम मन्दिरमा स्थापित हुने मूल स्वरूप नै नेपालको शिलाबाट तयार गरिनेछ’ उनले भने, दुईवटा शिलाबाट एकै साथ मूर्ति बनाइनेछ । राम मन्दिरमा ४ सय वटा कलात्मक पिल्लर राखिएको छ । हरेक खम्बामा १६ वटा देवीदेउताका मूर्ति कुदिनेछ । मन्दिर न्यास समितिले सार्वजनिक गरेको विवरण अनुसार मन्दिरको ४० सय खम्बामा गरी ६ हजार ४ सय देवी देउताका कलात्मक मूर्तिहरू कुदिनेछ ।

जनकपुरधाममा ल्याइएको उक्त देव शिलाको आज जनकपुरधामस्थित जानकी मन्दिरमा दर्शन, पूजन एवं महाआरती गरी अयोध्या पठाइने जनाइएको छ । सो पूजामा मधेस प्रदेशका मुख्यमन्त्री सरोजकुमार यादवको पनि सहभागिता रहनेछ ।

गत बुधबार देव शिला काली गण्डकीबाट निकालेर गलेश्वरधाम परिसरमा लगिएको सो शिला मन्दिरमा रुद्राभिशेकसहित विशेष पूजा गरी जनकपुरधाम हुँदै अयोध्याको लागि बिदाइ गरिएको थियो । म्याग्दीको बेनी ६ ठुलोपहिरोस्थित काली गण्डकी नदी किनारको शिला बुधबार क्रेनमार्फत निकाली गाडीमा राखेर गलेश्वर लगिएको थियो ।

LEAVE A REPLY

Please enter your comment!
Please enter your name here