इन्डोनेसियाको पपुवा क्षेत्रमा पृथकतावादी लडाकुहरूले न्यूजिल्याण्डका एक पाइलटलाई अपहरण

0
41

इन्डोनेसियाको पपुवा क्षेत्रमा पृथकतावादी लडाकुहरूले न्यूजिल्याण्डका एक पाइलटलाई अपहरण गरेका छन् । उनले पाइलटलाई मार्ने धम्की दिएका छन् ।

विमानमा आगो लागेपछि नुडगाको पहाडी क्षेत्रमा अवतरण गर्न बाध्य हुँदा पाइलट फिलिप मर्टेन्सलाई अपहरण गरिएको थियो ।

विमानमा एक बालकसहित पाँच जना यात्रु पनि थिए । यात्रुलाई रिहा गरेको अनुमान गरिएको छ । पृथकतावादीहरूले इन्डोनेसियाले पश्चिम पपुवा प्रान्तलाई स्वतन्त्र घोषणा गर्न माग गरेका छन् ।

प्रहरीले यस विषयमा अनुसन्धान गरिरहेको जनाएको छ । तर यसमा निकै मुस्किल छ किनभने इलाकामा विमानमार्फत मात्रै पुग्न सकिन्छ ।

पश्चिमी पपुवामा सक्रिय नेशनल लिबरेशन आर्मीले अपहरणको जिम्मेवारी लिएको छ । इन्डोनेसियाली सरकारले यसलाई आतङ्कवादी समूह मानेको छ ।

नेशनल लिबरेसन आर्मीका प्रवक्ता सेबी साम्बोमले इन्डोनेसियाले ‘अडिग अडान लिए’ र पश्चिम पपुवाको स्वतन्त्रताको लागि वार्ता गर्न असफल भएमा पाइलटको हत्या गरिने धम्की दिएका छन् ।

यसै क्रममा न्यूजिल्याण्ड सरकारले घटनाबारे आफूलाई जानकारी रहेको र इन्डोनेसियामा रहेका आफ्ना राजदूतले पाइलटको परिवारलाई सहयोग गरिरहेको बताएको छ ।

समाचार एजेन्सी एसोसिएटेड प्रेसका अनुसार उक्त विमान सुसी एयरको थियो, जसले छिमेकी जिल्ला टिमिकाको खानी सहरबाट सामान आपूर्ति गरिरहेको थियो ।

पपुवा क्षेत्र एक डच उपनिवेश हो जुन दुई भागमा विभाजित थियो – पपुवा र पश्चिम पपुवा ।

संयुक्त राष्ट्र सङ्घको निगरानीमा भएको विवादित मतदानपछि यसलाई इन्डोनेसियामा समावेश गरिएको थियो । त्यसयता पृथकतावादी र इन्डोनेसियाली सेनाबीच भिडन्त जारी छ ।

यस्तै, पपुवा र पपुवा न्यु गिनी दुई फरक ठाउँहरू हुन् । पपुवा न्यु गिनी सन् १९७५ मा अस्ट्रेलियाबाट स्वतन्त्र भएको देश हो ।

LEAVE A REPLY

Please enter your comment!
Please enter your name here