नेप्से बढेपनि कारोबार रकम घट्यो

0
33

यस साता सेयर बजार परिसूचक ३०.३४ अंकले बढेर बजार बन्द भएको छ। गत साता २०३७ मा बन्द भएको सेयर बजार यस साता २०६८ बिन्दुमा पुगेको हो।

बजार बढेपनि सातागत कारोबार रकममा भने १२.७६ प्रतिशतले घटेर १० अर्ब ५० करोड रुपैयाँमा सीमित भएको छ।

गत साता भने बजारमा १२ अर्ब रुपैयाँको कारोबार भएको थियो। यस साता कारोबारमा आएको सेयर संख्यामा पनि १५ प्रतिशतले कमी आएको छ।

यस साता समूहगत परिसूचकहरूमध्ये जीवन बीमा, लगानी र उत्पादन मुलक समूहको परिसूचकमा उच्च गिरावट आएको छ।

अपर हेवा खोलाका लगानीकर्ताले एकै सातामा ५८ प्रतिशत लाभ पाएका छन्। त्यस्तै, सामूहिक लगानी कोष एनएमबी ५० का लगानीकर्ताहरूले सबैभन्दा धेरै नोक्सान व्यहोरेका छन्। यसमा २०.७ प्रतिशतले गिरावट आएको हो।

सेयर संख्या र कारोबार रकमको आधारमा रिडी हाइड्रोपावर अग्रस्थानमा छ। कम्पनीको यस साता ७० करोड रुपैयाँको सेयर कारोबार भएको हो।

बजारमा सूचीकृत कम्पनीहरूको वित्तीय विवरण सार्वजनिक भइसकेको र लाभांश प्राप्त गर्ने अवधि नजिकिने भएकोले पनि बजार धेरै घट्न सकेको छैन।

कम्पनीहरूले आगामी दिनमा घोषणा गर्ने लाभांश दरको आधारमा बजारको गति निर्धारण हुनेछ। हाललाई भने बजार स्थिर दिशामा अगाडी बढ्ने सम्भावना छ। केही समयदेखि नेप्से निश्चित सीमाभित्र रहेर घटबढ भएर साइडवेज मुभमेन्ट प्रवृत्तिमा बजार गरहेको भनिन्छ।

प्राविधिक विश्लेषण :
नेप्सेको रेखाचित्रमा बनाइएको ७ दिने र २१ दिने मुभिङ एभरेज विश्लेषणको आधारमा भने बजार गत आइतबारबाट वियरिश (घट्दो) प्रवृत्तिमा प्रवेश गरेको छ।

२१ दिने मुभिङ एभरेज रेखाले ७ दिने रेखालाई काटेर माथि लागेको छ। यसरी २१ दिने रेखाले ७ दिने रेखालाई काटेर माथि लागेमा वियरिश प्रवृत्तिमा पुग्छन्। ७ दिने रेखाले २१ दिने रेखालाई काटेर माथि लाग्ने प्रयास गरेमा भने बुलिश (बढ्ने) प्रवृत्ति सुरू हुने मानिन्छ ।

नेप्सेको मैनवत्ति चित्रमा अन्तिम तीन दिनमा पहिलो दिन बजार घटेर लामो कालो (रातो) आकारको मैनवत्ति चित्र बनेको थियो भने दोस्रो दिन डोजी आकृति बनेर अन्तिम दिन बजार बढ्ने सम्भावना देखाएको थियो।

फलतः अन्तिम दिन बजार सूचक नेप्से बढ्यो पनि। तर, अन्तिम दिन बनेको सेतो (हरियो) मैनवत्ति चित्रले त्यसअघि बनेको रातो मैनवत्तिको शरीर समेत पार गर्न सकेन। यसले बजारमा वियरिश प्रवृत्तिले नै बढी दबाब दिइरहेको संकेत गरिरहेको छ।

बजार अधिक बिक्रीको अवस्थामै रहेको नेप्सेको १४ दिने आरएसआई सूचकले संकेत गरिरहेको छ। बिहीबार यो सूचक २९.७१ बिन्दुमा छ।

आरएसआई सूचक ३० मुनि भएमा बजार अवमूल्यन भएको र ७० माथि भए अधिकमूल्यन भइरहेको र ३० देखि ७० बीचमा रहे सन्तुलित अवस्थामा रहेको विश्लेषण गरिन्छ। यद्यपी बुधबार नेप्सेको यस्तो सूचक २३.२८ सम्म पुगेर फर्किएकोले बजारमा सन्तुलन कायम हुन खोजिरहेको देखिन्छ।

यस साता २०८८ मा उच्च बिन्दु बनाएको नेप्सेको पिभट विश्लेषण अनुसार आगामी बजारले दुई हजार एक सय दुई बिन्दुमा पहिलो प्रतिरोध पाउने र त्यहाँबाट बजार घट्न थालेमा भने २ हजार १८ मा टेवा पाउने देखिन्छ।

LEAVE A REPLY

Please enter your comment!
Please enter your name here